Das Fasnachts-Comité sagt Dankeschön

D Larve sitzt und isch paraad.
Loos goots nämlig jetze graad.
Und au s Kopfladärnli goot,
wos am Mäntig Vieri schloot. 

D Larve blybt denn bald dehai.
S kunnt an Cortège d Larve zwai.
D Sujetlarve ooni Lampe
duet drnoo die Route trampe.
Wääge, Gugge, Glyygge, Schääse
und mit Huet so schwarzi Wääse.
Daas isch Cortège, s macht di froo.
S wurd nit ooni Hälfer goo.
Si hänn Arbet und nit frei
wie zum Byspiil d Bolizei.
Andri fäädle alli yy
und d Kadette gseesch au glyy.
D Fyyrweer isch no uff Pikeet
zämme mit dr Saniteet.
Mit Maschine zimlig groosse
butze andri schliesslig d Stroosse.
D Larve hänn do gärn dr Maage
und dien alle danggscheen saage. 

D Larve macht dr Zyschtig nit,
doo macht d Larven ains no mit.
D Larve zwai, wo Fasnacht macht,
gseesch am Mittwuch bis in d Nacht.

Und am Donnschtig muesch verkinde:
Baidi Larve mien verschwinde.
Baidi findes zwor bitz doof,
aber s kunnt dr Summerschloof,
doch dr Wegger wird bizyyte
denn am zwaite Meerze lyyte. 

S Fasnachts-Comité 
Basel, am 14. Meerze 2019